Document 139
Saint Valentine's Day: Glesga
Author(s): Sheena Blackhall
Copyright holder(s): Sheena Blackhall
Options:
Highlight word:
Text
Wi thawin frost an dubs, the noo
Twid freeze a bear in an igloo
In Glesga, on this luvers' day.
Halflins aroon ae tree are hotchin
Far cloots insteid o leaves are hatchin
Tae the fower wins their wirds despatchin
In Glesga, on this luvers' day.
On a park bench, twa lassies blether
Screivin their cards, they winner whether
They ocht tae sign them, 'Yours foriver'
In Glesga, on this luvers' day.
Blue doos flee up the Heivenly stair
As free as odes bi Baudelaire
Their feathery oxters beat the air
O Glesga, on this luvers' day.
Twa magpies coortin in the park
Flee aff, at gallus collie's bark
A beech tree chitters in her sark,
In Glesga, on this luvers' day.
A purple crocus blinks an ee
At grannie, practisin Tai Chi
A gray an gracefu butterflee
In Glesga, on this luvers' day.
I am nae sensual Aphrodite
Or nyaakit nymph wioot her nightie
Queer bird, tae threip o maitters flightie
In Glesga, on this luvers' day.
Watter is dreepin doon ma lug
Yet, here I staun, hairt-strings tae rug
Tae gie St. Valentine a plug
In Glesga, on this luvers' day.
Sic poems should be a tidal wave
Spakk bi bauld youth, hett bluided, brave
Nae some auld yowe, ae fit in grave,
In Glesga on this luvers' day.
A biker tattoed wi graffiti
His pectorals say 'I lue Rosie'
Stauns wi a quine fa sooks a sweetie
As sangs war sung, this luvers' day.
An aa the while a Japanee
Made paper birds fur us tae flee
The things that ither cultures dee
Tae shaw they care, this luvers' day!
A lassie in a navy jaiket
The hale performance filmed an tapit
The Internet maun nae be swickit
Doon-load yer lust, this luvers' day!
Ach weel... fowk didna boo, nur sweir.
Twa luvers, wooin on a cheer
War that engrossed they didna hear
Ma barderie, on this luvers' day.
An syne, I left fur Aiberdeen..
Fowk muttered 'Surely nae sae seen'
Cupid luiks best in granite steen
Fin yer ower auncient fur luv-play.
My hame is scoored bi win an cauld
Bit fit's the difference fin yer auld?
For yon's far my best tales were tauld
O coortin, on this luvers' day.
This work is protected by copyright. All rights reserved.
The SCOTS Project and the University of Glasgow do not necessarily endorse, support or recommend the views expressed in this document.
Cite this Document
APA Style:
Saint Valentine's Day: Glesga. 2024. In The Scottish Corpus of Texts & Speech. Glasgow: University of Glasgow. Retrieved 21 November 2024, from http://www.scottishcorpus.ac.uk/document/?documentid=139.
MLA Style:
"Saint Valentine's Day: Glesga." The Scottish Corpus of Texts & Speech. Glasgow: University of Glasgow, 2024. Web. 21 November 2024. http://www.scottishcorpus.ac.uk/document/?documentid=139.
Chicago Style
The Scottish Corpus of Texts & Speech, s.v., "Saint Valentine's Day: Glesga," accessed 21 November 2024, http://www.scottishcorpus.ac.uk/document/?documentid=139.
If your style guide prefers a single bibliography entry for this resource, we recommend:
The Scottish Corpus of Texts & Speech. 2024. Glasgow: University of Glasgow. http://www.scottishcorpus.ac.uk.
Information about Document 139
Saint Valentine's Day: Glesga
Top
