SCOTS
CMSW

Document 515

Katy the Crocodile

Author(s): Sheena Blackhall

Copyright holder(s): Sheena Blackhall

Text

Poems in Scots for Littlins

Hoolet

I am the hoolet in the tree
I like moosies fur ma tea
I ett their fuskers, tails an heid
An wash them doon wi ratten's bleed!


Sam Suzuki

I'm a firewirk fu o starns
Tae peint alang the nicht
Niver haud me in yer haun
Or ye will get a fricht
Fur 'Bang' I'll gyang
An fire will poor
Hyne ooto ma bihoochie
Vrocht in Taiwan
Tae bring fowk fun
Ma name is Sam Suzuki.


Snailie (i)

Snailie snailie on the waa,
Are ye niver feart ye'd fa?
Wi yer hoosie on yer back
Like a hiker wi a pack?
Feech, snailie! Dicht yer snoot!
Slivvrin ower the watter spoot!


The Snailie (ii)

A snailie heistit his hornies up
Ae simmer's day, ae simmer's day.
Ahin a gowden buttercup,
Come oot tae play, come oot tae play.

Bit first ae hornie,
Syne anither,
Wis drookt wi rain, till,
Feech! Sic weather!
He cried, an pued his hornies doon
A weeter an a wycer loon.


Snailie (iii)

Slivvery, slivvery, bubbly snoot
I am the snail frae the watter spoot
I cairry ma hoosie upon ma back
An draa in ma heid
Fin the skies are black.


Shoppies: tune: "Wha saw the 42nd?"

Fa sells ye minty sweeties?
Far dae ye buy them ma?
Fa sells ye minty sweeties?
Is't a corner shop or staa?

CHORUS
Some fowk gang tae supermairkets
Some fowk dinnae shop at aa
Some fowk noo e-mail their eerins
Niver leave the hoose at aa!

Fa sells ye crabs an fishies?
Far dae ye buy them ma? etc.

Fa sells ye claes an ribbons?
Far dae ye buy them ma? ... etc.


Mr Ted

Fin I pit on ma jammies, an climm the stairs tae bed
I ken that he'll be wytin, ma frien caad Mr Ted
An fin I coorie doon tae sleep
I'll haud him in ma bosie
He's made o fur, he disnae gurr
He's affa affa cosie


Watchin TV

Cricket!
Foo mony runs wis thon?
Can I nae cheenge channels?
I canna?

Yon's nae fair...
Jist cause I'm wee
It's Dae this
Dae thon
Ye mauna!

Ma, can I bide up late?
Foo nae?
Mrs Smith lets my frien John!
I've washed ma lugs
An ma teeth's clean tee
There's aliens comin on Channel 3
Foo can I nae bide up tae see
TV, fin there's monsters on?

Da, there's a cartoon on jist noo.
Fit wye maun I watch the news!
I've deen ma hamewirk
I've fed the dug
I've cleared ma lego frae aff the rug
Oh fan div I get tae choose!


Fitbaa

Fitbaa is the favourite game
O Mrs Baxter's loon.
She canna dish his denner up,
If he is dowpit doon,
Tae watch it on the TV screen.
He canna aim his moo...
The beans faa aff his suppin speen
They're on the carpet, noo!


Missus Kangaroo's Pooch

Fit's in yer pooch, Missus Kangaroo?
A cuckoo clock, or a pirate crew?
Or a blue-tailed gibbon frae Embro zoo?
A wee roon cake? Or a pirn-taed doo?
Oh, fit's in yer pooch, Missus Kangaroo?


Charlie Cheetah

Charlie Cheetah's taen the chukkenpox,
They sent him hame frae skweel
Wi a fever an a furry tongue
He really wisna weel
That's the wye he's hingin luggit
An he's wabbit an he's wae
He's the faistest rinner in the class
He's missin Sports, the day.


The Bengal Tiger

I am a Bengal tiger,
Upon a fence I trippit,
Fin it wis newly peintit,
An yon is foo I'm strippit!


Leddylanners

Spottit semmit,
Gollach's wings,
Reistin far
The harebell hings.

Leddylanners,
Ruby reid,
Yer a drap o
Fleein bluid.

Pitter patter
Doon ye faa
Dowpin, deinty
On the waa.


The Heilan Coo

MOO MOO MOO
I'm a Heilan coo,
Twa horns fur a hat,
An a winnerfu view.

I dinna ett sweeties,
Or skirly or stew,
MOO MOO MOO
I'm a Heilan coo.


Robin Reidbreist

Fa's that stottin ower the sna?
Robin Reidbreist, roon an sma
Wi a fire upon his sark
Tae licht his hoosie in the dark.


The Robin Sang
tune: Chick-chick-chicken

Rob-rob-rob-rob-robin
Stottin up an doon sae reid
Rob-rob-rob-rob-robin
Wid ye like a daud o breid?
Fur ye michtna get a crumb till Xmas
Nae even a shakk o seed
Sae Rob-rob-rob-rob-robin
Wid ye like a daud o breid?

Rob-rob-rob-rob-robin
Wid ye like a crust or twa?
Rob-rob-rob-rob-robin
Wi yer feathers broon an braw
Fur the sky is cauld an wintry
An I think it's gaun tae snaa
Oh Rob-rob-rob-rob-robin
Wid ye like a crust or twa?

Rob-rob-rob-rob-robin
Wid ye like a drap tae drink?
Rob-rob-rob-rob-robin
Cause the pond's like a skatin rink
An the icicles are jigglin
An it's caulder than ye think
Oh Rob-rob-rob-rob-robin
Wid ye like a drap tae drink?


The Cat's Pyjamas

Ma's awa tae a hen nicht,
A cluck o wifies claikin,
Will she win hame wi a beak an caimb,
Efter her meenlicht raikin?

Da's awa tae a stag nicht.
Will he staun in the street an roar?
If he jynes the breed wi horns on its heid,
Will we let him back ower the door?

Da says I ett like a grumphie,
Ma says I've the sense o a flee,
Gran say's I'm the cat's pyjamas,
Bit I say I'm jist me!


Charity Shop

Dalls an knickers,
Lampshades, stickers,
Kettles, forks
Recycled claes
Blankets, mochles,
Buits an bauchles
Selt, aa gyang their separate wyes.

Scarfs an jammies
Caps fur mannies
Flooerpots on the windae sill
Jam jars
Go cars
Xmas tree stars
Cast aff trock
Fills up the till.
Can ye sell them?
Aye, we will!


Midgies

Vampires roon the campfires,
Heeze heeze heeze.
Midgies, midgies, midgies,
Dinna bite please!

Ging tae Transylvania!
Ging an takk a dook!
Bit Midgies, midgies, midgies,
Dinna takk a sook!


The Slater

Naebody likes me!
I am a slater
Ye chase me an squash me
Bit I'm jist a craitur
The same as a kittlin
A dug or a moose
An I dinna need
Hauf as much
Space in yer hoose!


Towser the Tyke

Far's ma lead?
Far's ma dish?
Far's ma tasty been?
Bowf? Bowf? Bowf? Bowf?
I bide in Aiberdeen. I am
The faistest, fiercest, tyke
That ye hae iver seen!


Teacher

Teacher's got a fite boord,
Teacher's got a blackboord.
Teacher's got a stick o chakk, computer an a pen
Teacher's got a heidache, teacher takks a teabreak
Dylon Buchan's fechtin Jamie Paterson again!


Foo Mony Hoolets?

Foo mony hoolets hoot
Roon aboot the hoose?
There's hungeret Horace Hoolet
On the look-oot fur a moose

There is genteel Harry Hoolet
Suppin denner wi a speen
There is scunnerin Hackit Hoolet
Wi his oxters bowfin green.

There is sleekit Hamish Hoolet
Wi a doocot fur a nest
There is a slystery Hetty Hoolet
Wi her pudden doon her vest

There is Hooligan the Hoolet
Luikin fur some glaiss tae smash
Flew intae a double decker
Noo he's Hoolet-Instant-Mash

There is Skinnymalinkie Hanna
Fatty Hetty big an broon
There's a hoolet caad Horatio
Fa ay sleeps upside doon

Foo mony hoolets
Hoot roon aboot the hoose?
As mony as the bubbles
In a tin o orange juice!


Dyeuk

Custard wis ma favourite food
As muckle's I cud swalla,
Until the day I waukened up,
Ma beak an feet war yalla!
An noo, I plap aroon the warld
A skyrie, dowie, dyeuk
Wi a neb an twa flat flippers
That's the colour o a plook!


Hedgehog

Dauchle awhile, an gie's yer crack.
Michty! Siccan a jobby back!
Preens fur a sark, like a beson's bristle,
Yer as stobby's a dykside thrissle!
Fin danger's near,
Yer heid's in yer dowp.
Tapsalteerie, ower ye cowp!


Katy the Crocodile

Katy the crocodile stappt her moo,
Wi chocolate, chips an cheese.
She raxxed yer jaws an she fullt her wame
Wi puddens an cakes an peas.

She fried her tatties, she fried her breid,
In a pan o gruesome grease,
An efter a year or twa o thon,
Her belly it reached her knees.

She cudna daunce, or sweem, or wauk,
She jist grew fat an fatter.
Fin Katy lowped in the jungle puil,
There wis nae room left fur watter.

She grew as roon as a green balloon,
Till she ett her last meringue.
Wi a terrible soon, frae taes tae croon
She blew up wi a bang!


Bath-Room Bogle

Doon in the foon
O oor fite bath,
Dowpit on echt black legs,
A wyver sits wi a smirk on its moo
Wytin tae gie folk flegs.

Turn on the tap!
Sweel him awa!
Belly, oxter, an lug!
Ae black wyver
On echt black legs
Vanishin doon the plug!


Guy Fawkes
Tune: One more step... (An Action Song)

James the Saxth rode intae Lonnon toon x3
Chorus: Far the Thames gaes rowin ower

James the Saxth pit on the English croon x3

Guy Fawkes didna like the new king's wyes x3

He crept tae a cellar unner parliament x3

Guy Fawkes tried tae blaw the hale place up x3

They catched him an killt him doon in Lonnon toon x3

Licht the bonfires let them burn, burn, burn x3



Wee Neep

It's Halloween, wee neep in the park!
We'll teem yer belly
We'll save yer sark
Pit caunles inno yer twa neep een
Fur a ghaistie-licht at Halloween.


Mollochy Mowdie

Mollochy Mowdie howks an howks
Till up through the grun his black neb powks

Mollochy Mowdie's blin's a bat
He cudnae tell cake fae a fit d'ye caat


Willie Wirm is tied in knots
Because he disnae ken
If it's his boddom or his tap
That's heid or hinner-en!


Forkietailie

If I cud be a beastie
I wadna be a snail
Fa humfs his hoosie on his back
Alang a slimey trail
I wadna be a centipede
Wi hauf a hunner beets
And hauf a hunner socks tae rug
Aroon ma gollach's queats
If I cud be a beastie,
I'd be a forkietail
Wi a shears on my bihoochie
And an armoured coat o mail.


Octopus

An octopus's oxters
Are dichtit eence a day
He soaps them wi a sea sponge
Afore he gings tae play
At fitbaa wi a mermaid
A labster an a sole
Bit every kick he catches,
They can niver score a goal!


Dinna be Roch
tune: Holy Spirit Hear Us

Dinna be roch be gentle
Dinna be coorse be gweed
Be polite an helpfu
Think o anither's need

Dinna tel lees be truthfu
Dinna makk ithers greet
Dinna be lazy, wirk hard
Be kind tae fowk ye meet

Dinna be rude or selfish
Dinna gie chikk ava
Takk tent an ay be cannie
Things brakk if they should faa

Dinna makk feels o ithers
Dinna lauch at the weak
Fin ither bairns miscaa ye
Turn roon the ither cheek


Dentist

Dentist, dentist, ma tooth's sweet
Will I need a fillin fin I'm dowpit in yer seat?

If I pass yer check up, I'll promise that I'll eat
An aipple or a tangie fur a treat, treat, treat.

I'll clean ma teeth at bedtime,
Finiver Derkness comes,
Tae stop the germs wi clarty buits
Fae dauncin on ma gums.


Giraffe

Skinnymalinkie lang legs
Shanks like drinkin straas
Nosey giraffe has legs like straas
Fur teetin ower waas


Bus

Ching! Here's a pensioner. Wyte till she's on
Move ower an gie her a seat, come on!

Staunin room anely! Step ben, step ben!
We hinna go aa day tae wyte, ye ken
Click ging the wipers. Rainin again!


Taxi Driver

Taxi Driver, fit's yer fare
Hurlin fowk fae here an there?
Taxi Driver gin yer late
Plane an pilot winna wait!


Doctor

Sen fur the doctor, my kyte's churnin
Sen fur the doctor, my chikk's burnin
I will takk a mixture or a great big peel
Sen fur the doctor cause I'm nae weel


Postie

Dunt, gings the letterbox! My, fit a thrill!
I got a letter. Mither got a bill
Granny got her pension, Granda got a pack
Sae aabody got somethin fae the pyoke on postie's back.


The Warlock

There wis a warlock tried tae makk
A spell tae gar the lichtenin crack
Bit fin he steered his muckle pot
A drap o rain wis aa he got

Till he can turn cheese tae chakk
He's weirin L-plates on his back


This work is protected by copyright. All rights reserved.

The SCOTS Project and the University of Glasgow do not necessarily endorse, support or recommend the views expressed in this document.

Close

Cite this Document

APA Style:

Katy the Crocodile. 2020. In The Scottish Corpus of Texts & Speech. Glasgow: University of Glasgow. Retrieved February 2020, from http://www.scottishcorpus.ac.uk/document/?documentid=515.

MLA Style:

"Katy the Crocodile." The Scottish Corpus of Texts & Speech. Glasgow: University of Glasgow, 2020. Web. February 2020. http://www.scottishcorpus.ac.uk/document/?documentid=515.

Chicago Style

The Scottish Corpus of Texts & Speech, s.v., "Katy the Crocodile," accessed February 2020, http://www.scottishcorpus.ac.uk/document/?documentid=515.

If your style guide prefers a single bibliography entry for this resource, we recommend:

The Scottish Corpus of Texts & Speech. 2020. Glasgow: University of Glasgow. http://www.scottishcorpus.ac.uk.

Close

Information about Document 515

Katy the Crocodile

Text

Text audience

Children (under 13s)
General public
Males
Females
Audience size 1000+

Text details

Method of composition Handwritten
Word count 2194

Text medium

Book

Text publication details

Published
Publisher Self: Limited Edition / Thistle Reprographics
Publication year 2004
Place of publication Aberdeen

Text setting

Education

Text type

Poem/song/ballad
Other Collection of poems

Author

Author details

Author id 112
Forenames Sheena
Surname Blackhall
Gender Female
Decade of birth 1940
Educational attainment University
Age left school 16
Upbringing/religious beliefs Brought up Protestant, now Buddhist
Occupation Writer and supply teacher
Place of birth Aberdeen
Region of birth Aberdeen
Birthplace CSD dialect area Abd
Country of birth Scotland
Place of residence Aberdeen
Region of residence Aberdeen
Residence CSD dialect area Abd
Country of residence Scotland
Father's occupation Manager of Deeside Omnibus Service
Father's place of birth Aboyne
Father's region of birth Aberdeen
Father's birthplace CSD dialect area Abd
Father's country of birth Scotland
Mother's occupation Private Secretary
Mother's place of birth Aberdeen
Mother's region of birth Aberdeen
Mother's birthplace CSD dialect area Abd
Mother's country of birth Scotland

Languages

Language Speak Read Write Understand Circumstances
English Yes Yes Yes Yes
Gaelic; Scottish Gaelic Yes Yes Yes Yes Elementary. Gaelic choir. Poetry.
Scots Yes Yes Yes Yes

Close