Author(s): Tom Hubbard
Copyright holder(s): Tom Hubbard
Plookie an pockie, foustie roond the een,
Their wrattie fingers cleeked intil their hochs;
Wi doobtsome scruif their harnpans are owergeen
Like the cankert growthieness on cowpit brochs.
Ilk rickle o banes has shagged his-sel intil
The muckle mirkie skelet o his chair;
Aa day, aa nicht, it's fuitsie-fuitsie thrills
Wi wuiden baurs that shoogle ower the flair.
The auld cunts hae aye been plaitit wi their saits;
In simmer drouth, their flype turns calico;
Or else they're chitterin, like sairie taeds,
Govin at the winnock at the glushie snaw.
- An their saits aye sair thaim weill, like; shitey-broon,
The strae yields ti their hurdies' ilka sklent;
Spreit o the auncient sun lichts up, that's boond
In braids whaur there's the corn ti ferment.
An the erseboond, knees at teeth, green pianists,
Ten fingers bangin on aneath their sait;
Tempo di barca, largo e mesto, juist,
- Their heids keep time, near ti ejaculate.
Dinna steir thaim up, or else they're sunk!
Like skelpit baudrons, gurlin, apenin slaw
Their shouthers, feemin, fizzin, spairgin spunk -
Their hainches swall, their breeks fuff oot anaa.
You hear thaim dunt, thae baldy heidbangeers,
Their pows agin bleck waas; wi unco clack
They ramp their feet; the buttons that they weirs
Are beasties' een that keek oot fae the stack!
They can pley, forby, the invisible haund that kills:
Atween their winkers, seeps thon hellish bree
That, whan you leather your bitch, her look distils:
An you sweit, trapped in a cundie till you dee.
Erseboond again, their nieves encuffed in clert;
Joe Public's interruptions are fair cussed;
Their chinless cholls aye bobbin loose, - fae stert
o day till gloamin - tremmlin fit ti brust.
Whan their winkers faa intil a dour-like sloom,
They dover in their sexy saits' enbrace;
Wee dollyburds o chairs, reenged roond the room,
Encirclin desks you'd think looked on po-faced.
Ilk blume o ink draps comma-shapes o pollen,
Hushies ilk erseboond in his bit flour-cup
Like the adder-bell in flicht throu gladiolie
- An the ickers gar thae auld boys' pricks swall up.
This work is protected by copyright. All rights reserved.
The SCOTS Project and the University of Glasgow do not necessarily endorse, support or recommend the views expressed in this document.
Cite this Document
The Erseboond. 2021. In The Scottish Corpus of Texts & Speech. Glasgow: University of Glasgow. Retrieved May 2021, from http://www.scottishcorpus.ac.uk/document/?documentid=734.
"The Erseboond." The Scottish Corpus of Texts & Speech. Glasgow: University of Glasgow, 2021. Web. May 2021. http://www.scottishcorpus.ac.uk/document/?documentid=734.
The Scottish Corpus of Texts & Speech, s.v., "The Erseboond," accessed May 2021, http://www.scottishcorpus.ac.uk/document/?documentid=734.
If your style guide prefers a single bibliography entry for this resource, we recommend:
The Scottish Corpus of Texts & Speech. 2021. Glasgow: University of Glasgow. http://www.scottishcorpus.ac.uk.