SCOTS Project - www.scottishcorpus.ac.uk Document : 633 Title : Dipper: 21 - Still "Ridin Alang" Author(s): Dr James A Begg Copyright holder(s): Dr James A Begg Text Verses written for the Seventy-Fifth Anniversary Re-union Dinner Dance of the Forty-Sixth Ayrshire (New Cumnock) Scout Group, held in the Coach House Hotel, New Cumnock, on Saturday 5th October 1985. My Granpa Davie Currie ran the Scout Troop up at Bank, Afore the Furst Warld War, in days lang syne; An my Mither helped John Edwards tae rin New Cumnock Cubs, Till the Saicont War broke oot in Thirty-Nine. An tho it seems like thirty weeks, it's mair nor thirty year Sin I ettlt tae gang that gait mysel, An daunert doun the Miller Road tae jyne New Cumnock Scouts, ‘N like the rest faa under Baden-Powell's spell. Alec Geddes made me welcome, an so did John Burgoyne, An I shuin fell in wi aa the queer-like ploys - ‘Man the Ship’ an British Bulldog, an 'O'Grady says dae this', An ither weys o makin muckle noise! Aff tae camp we’d gae in summer wearin Airmy Surplus kilts, Wi oor Airmy Surplus kitbags fou o claes, Cook wi Airmy Surplus dixies, sleep in Airmy Surplus tents, While oor Airmy Surplus blankets warmed oor taes. Wi Airmy Surplus trenchin-tools, an Airmy Surplus spades, We’d dig a sheugh three fuit, by twae, by yin, An we’d squat in that latrine, wi the sheugh oor legs atween, An grunt, an hope an pray we’d no faa in! A fortnicht’s camp in Ireland awa back in Fifty-Fower, Cost a fiver for train an boat an meal, Six hunner-wecht o tatties, an fourteen dizzen loaves, An oor photo in ‘The Bulletin’ as weel! The Scout Group in the Sixties gaed frae strength tae strength, The auld wid hut wis burstin at the seams, But Whist Drives, Rag Drives, Concerts, an the sale o Christmas Cairds, Raised the siller for the Scout Hut o oor dreams. For this we thenkit parents, wha gied us o their time, Like C. McLatchie, Mrs. Nairn, an Jimmy Bain, An ither unsung heroes wha'd tak ower lang tae name, But wha's spare time tint wis ever Scoutin's gain. I wis prood tae help Tam Lisett tae rin the Forty-Sixth, Wi Nodder, Jimmy Findlay, John Burgoyne, While John Nairn ran the Cub Pack in his ain efficient wey, Alang wi brither Tam an Ian McCron. Dan Kennedy's auld lorry, or Lindsay's cattle float, Wad cairt us aff tae mony a cheery camp, While courit amang the campin graith, we'd sing awa the miles Heedless o rain, cauld wins, or muscle cramp. These were days o fun an pleisure for oorsels an for the Scouts, Oor tents were nou J. Black o Greenock's best; An the lads wha did the cookin an survived tae tell the tale. Cuid be put in ony kitchen tae the test! Awa went lumpy parritch, drount mince an taurry tea, Chips fried in butter, margarine an lard, Burnt custard (juist aboot!) became a memory o the past, An pot-roast cookin wisnae aa that hard! They built rafts an aerial runways, an rope brigs across the burn, Canoed in loch, an doukt in sun-kisst puil, Won Campin Competitions an District Challenge Hikes, An trampt across the hills tae faur Glen Trool. Hou the scentit smell o wid-smoke still wafts aboot my neb, I can see the sparks drift skywards oot o sicht, An the creckle o the campfire lang lingers in my lugs, As “Abide Wi Me” is sung tae end the nicht. I can taste the mug o cocoa juist afore we beddit doun, I can hear the lauchs an keckles frae ilk tent, Finin doun tae whuspert murmurs afore they drappt awa Tae the deep an dreamless sleep o lads content. I can hear the burds’ dawn chorus, sense the stillness o the morn, Feel the dampness o the dew upon the grun, Hear the clout o aixe on wid, an the clang o dixie lid, That lets us ken anither day's begun. But hou-ever lang we dwell on that Scoutin magic spell, We maun cast oor minds back five-an-seiventy year, For there's men we owe a debt, an we niver suid forget That wi'oot their wark we'd no be sittin here. We’ll no argue on the merits o the Toun Troop or the Bank, For in time they cam thegither aa the same, An the wark o Davie Currie, Johnny Cairns, an H. Burgoyne, Lives ever on regairdless o the name. Some will mind o Alec Gallagher, an Wullie Morrison, Pompey Broun, an Rover Leader Geordie Black, An Jim Kerr's inspiration an the courage that he showed, Whan lyin rackt an helpless on his back. There's that legend Johnnie Edwards, wha wi kind an gentle care, Had his Wolf Cubs tamed an eatin oot his haun; An the folk I dinnae ken, aa the lassies an the men, Wha've helpt New Cumnock Scouts gae on an on. Whan they reach their Hunnert Year, I for yin will hae nae fear That we'll fin New Cumnock Scouts baith hale an thrang, An we wish them Aa the Best, an keep 'Ridin on the Crest..', In the words o that maist famous Gang Show sang. ___ gait/road sheugh/ditch This work is protected by copyright. All rights reserved. The SCOTS Project and the University of Glasgow do not necessarily endorse, support or recommend the views expressed in this document. Information about document and author: Text Text audience General public: Audience size: 1000+ Text details Method of composition: Handwritten Year of composition: 1985 Word count: 892 General description: Anthology of prizewinning and other Scots poems, and short stories in Ayrshire Scots. Text medium Book: Radio: Other: Audiocassette Text publication details Published: Publisher: Luath Press Publication year: 1991 Place of publication: Barr, Ayrshire ISBN/ISSN: 0946487227 Edition: First Part of larger text: Contained in: The Dipper an the Three Wee Deils: Tales and Poems in Ayrshire Scots Editor: Authors: Dr. J. A. Begg and J. Reid Page numbers: 47-49 Text setting Leisure/entertainment: Private/personal: Text type Poem/song/ballad: Author Author details Author id: 623 Title: Dr Forenames: James Initials: A Surname: Begg Gender: Male Decade of birth: 1940 Educational attainment: University Age left school: 17 Upbringing/religious beliefs: Protestantism Occupation: Medical Practitioner Place of birth: New Cumnock Region of birth: S Ayr Birthplace CSD dialect area: Ayr Country of birth: Scotland Place of residence: Ayr Region of residence: S Ayr Residence CSD dialect area: Ayr Country of residence: Scotland Father's occupation: Clerical Officer, NCB Father's place of birth: Sandbank Father's region of birth: Argyll Father's birthplace CSD dialect area: Arg Father's country of birth: Scotland Mother's occupation: Primary Teacher Mother's place of birth: New Cumnock Mother's region of birth: S Ayr Mother's birthplace CSD dialect area: Ayr Mother's country of birth: Scotland Languages: Language: Danish Speak: No Read: No Write: No Understand: No Circumstances: A little Language: English Speak: Yes Read: Yes Write: Yes Understand: Yes Circumstances: Home, socially, at work Language: French Speak: Yes Read: Yes Write: Yes Understand: Yes Circumstances: Holidaying in France Language: Norwegian Speak: No Read: No Write: No Understand: No Circumstances: A little Language: Scots Speak: Yes Read: Yes Write: Yes Understand: Yes Circumstances: Home, socially, at work