SCOTS Project - www.scottishcorpus.ac.uk Document : 697 Title : The Buik o Ruth: 10 - Sermon at the Kirk o the Greyfriars 1974 Author(s): A S Borrowman Copyright holder(s): Mrs Lorna F Borrowman Text 16 October, 1974 To mark the Bicentenary of the death of Robert Fergusson. Dugald Fergusson gied us a lament, in sooth, a lament for a makar. My preachin has twa heids. The firsten in remembrance o Robert Fergusson the makar, wha deid twa hunder yeir sinsyne in the schells in the Embro Bedlam. Fergusson's life wasna lang, for he deid at the age o twinty-fower; a short life, albuist wi lustheid, wi its ain ploys, wi footh o aunters in brugh and kintrasid whilk, whiles, we dinna mind, thinkin anerlie o the dule, wanhap and wanhope whilk rinkit his daith. And a dolefu daith it was, liggan on the strae, in a chaumer o puirtith and cauld, in a biggan hecht a seek-hoose, mair richtly hecht a jile. Whan I mind o Robert Fergusson I mind als yon poem o Sorley MacLean's, translatit intil Lallans by the umquhile Regent and makar Douglas Young; My een are nae on Calvary or the Bethlehem they praise, but on shitten back lands in Glesca toun whaur growan life decays and a stairheid room in a Embro land, a chalmer o puirtith and skaith whaur monie a shilpet bairnikie gaes smoorit doun til daith. It's the chaumer o puirtith and skaith whilk gar me grue, for in siccan a chaumer Fergusson deid, and waesucks in our ain disjaskit warld, mairattowre our ain kintra fowk dee o puirtith and skaith. Whan I mind o Fergusson I tak tent o his puirtith and wanchancy daith, aye, but I mind that Fergusson was a gleg and eident chiel; that he sang like a lintie (wasna he Sir Precentor o the Cape Club?), that he was a guid fier, but I mind abune aa, that he was a skeely makar; his banes ligg in the mools in the Canongait Kirkyaird, but his saul gaes stramplin on. We leeve in a sair belbevart warld, a warld o alagust, begeek and malacord. Man mindsna his ain brither wha has God til his forebear, but minds raither himsel, ilk rnan for himsel, and the deil tak the hinmaist, whan he kens richt weel that ilk man for himsel and the deil taks the hail clanjamphrey! Sae we maun seek social justice for aa men o aa thede, mindin aye we canna evite dule and pain and that naething is coontit ferture nar uphoug exceptin the malversion o the saul. The pooer o Christianity liggsna in argle-bargle anent the ferlies o the faith; the remarkables o the vangell an siclike. That's an auld sang whilk nae dout satisfied our faithers and our forefowk but says gey little to the fowk o our ain days an eild. The waas biggit lang syne are dung doun, the verra founds are shooken and man is left wantit a bield. For monie fowk jalouse life is a lang journey intil the nicht and intil the daurk. In sooth, its a lang journey. The langest journey a man taks is the journey intil himsel, a journey to find wha he is, fou he's here, and whaur he's gaun. I canna gie ye onie cousie nor couthie answer. It's owre kittle. The pooer o Christianity in this disjaskit and discomfist warld liggs shairly wi ane bydan and on gaun thocht o God the Faither, and men as brithers, aa deponit in the life o Jesus hecht the Christ. Men want nae bield but aunters vast o the ingine and o the speerit - a tulzie wi greenyoch, mushinfu and sleekit fowk. I sall nail it wi scripture, frae first John fower, and twinty. "Gif a man threip, I loe God, but loesna his brither, he is a leear." And frae John fifteen and twal. "This is my mandment that ye loe ane anither." Guid fowk, think on thae things. This work is protected by copyright. All rights reserved. The SCOTS Project and the University of Glasgow do not necessarily endorse, support or recommend the views expressed in this document. Information about document and author: Text Text audience Adults (18+): General public: Informed lay people: Males: Females: Audience size: 100+ Text details Method of composition: Typed Year of composition: 1974 Word count: 640 Text medium Book: Other: Sermon originally delivered orally to mark bicententary of the death of Robert Fergusson Text publication details Published: Publisher: Gordon Wright Publication year: 1979 Place of publication: Edinburgh ISBN/ISSN: SBN 903065 30 4 Edition: 1st Part of larger text: Contained in: The Buik o Ruth and ither wark in Lallans Editor: Author: Alex S. Borrowman Page numbers: 32-33 Text setting Religious/ceremonial: Text type Prepared text (e.g. lecture/talk, sermon, public address/speech): Author Author details Author id: 755 Forenames: A Initials: S Surname: Borrowman Gender: Male Decade of birth: 1910 Educational attainment: University Age left school: 17 Upbringing/religious beliefs: Protestantism Occupation: Parish Minister Place of birth: Stirling Region of birth: Stirling Birthplace CSD dialect area: Stlg Country of birth: Scotland Father's occupation: Shop assistant Father's place of birth: Stirling Father's region of birth: Stirling Father's birthplace CSD dialect area: Stlg Father's country of birth: Scotland Mother's occupation: Dress maker Mother's place of birth: Dunblane Mother's region of birth: E & SE Perthshire Mother's birthplace CSD dialect area: Per Mother's country of birth: Scotland Languages: Language: English Speak: Yes Read: Yes Write: Yes Understand: Yes Circumstances: all circumstances Language: French Speak: Yes Read: Yes Write: Yes Understand: Yes Circumstances: Language: German Speak: Yes Read: Yes Write: Yes Understand: Yes Circumstances: Language: Scots Speak: Yes Read: Yes Write: Yes Understand: Yes Circumstances: for literary purposes