SCOTS Project - www.scottishcorpus.ac.uk Document : 210 Title : The Grunstanes Author(s): Iain W D Forde Copyright holder(s): Iain W D Forde Text CHEPTIR ANE The Grunstanes Ma mither's cryed Sairie. Afoir shae wes mairriet on Hugh Brecham shae wes cryed Sairie Grunstane. Whan, wiouten onie wird, ma faither lowpit the kintra, ma mither bak-chynged ti hir maidin nem. Shae telt'z at hir guidman wes nou a tratour, brigganner an liear an at ma brither an masell suid alter our signators ti Grunstane. Bot A wuidna, an wul aye be kent bi the nem ma faither gied me, Frizell Brecham. Ma brither John follaed ma mither. John isna o ma bluid, ye ken. Born i Efrika, he wes wantin kin, sae ma mither an faither adopit'm whan he wes bot a spruit. John aye gangs Mither's gate tho A dinna wyte'm fur't. He wuid bene a sterved orphant gin mither hedna taen'm unner hir weing. Nou he's a beig, sonsie loun an mair clos ti me nor onie ither buddie i the warl. Bot A hae vaiged awaw frae ma subjek - Mither. Ye ken, tho, at it's aye mair blythsum ti wryte about thaim at ye ir fain o. Oniegates, ye maun stert sumwhaurs. Ye'l hae takken tent at faither wes thocht ti be an unco cours deil eftir he plunkit hiz dewties. Nae dout ye mey speir whitwey ye didna hear tel o siccan a skellum. The'r guid raison. Tho ye peruissit aw the nyowspeypers an leistent ti iwerie braidkest, ye winna jalouse whit familie ye ir readin about. Ye winna ken o Hugh Brecham at vainisht frae the knawlege an sicht o mankynd wi a saicret machine stown frae the gouvernament, an at a whylie syne i a nicht o drumlie haar hiz puir faimilie fun a deid auntieloip i the laft o thair bungalo. The poliss hed ti gralloch it, afoir thai tillie-hewit it apairt an tuik it outby throu the trap i creils. Than the neipours stow aw the gigots an loins an hed a branderin o'm. Na! ye wuidna ken o'd fur it wesna telt o i the meidia, no ein the meisterie o ma faither's 'sauntheid'. Bot A ken nou whitna gemm wes on gaun an ettil ti gie ye an aefauld account o the hale hypothek gin ye'l leisten eydentlie. Afoir A set tilt tho, A suppone ye'l be wunnerin whitna lassikie is this at wul hing out the faimilie's fyled waashin fur the sicht o aw an sindrie? Weill, ye'r richt. A suidna dae't, bot A canna haud bak, fur ma Faither an masell ir, i ae respek, aw ae ou. We cuid nivver gie owre an inlat ti tel a taill. Whan we wes littlins he wuid gie'z lang lagamachies about hiz youthheid at wes niwer teidisum. A sei nou at thae flaws gied him a heize ti drie hiz weird an at A tak eftir'm. At thon tyme, thae taills gart ma fowks argie-bargie lik gib an tyke, fur ma Mither thocht sic yairns bot sprowsin, tho ti ma Faither thai wis gospel an catecheism rowed intil ane an wes nae mair a lie nor the Guid Buik itsell. Forby aw thon, A hae a det an dewtie ti ma faither. Juist as the Israelytes yaised the Auld Buiks ti pas on thair lairs an trewths ti fuither generautiouns, Hugh Brecham ettilt ti lat me ken hiz vairsioun o the wull aventurs at brocht about hiz dounfaw. He did it bi endytin a dyet buik an dernin it awaw whaur he kent A wuid fin it. Lik A wrate i the foirgaun, eftir readin't, A sei the warl aw deifferand, altho nocht subtantious hes chynged. Bot ti gie ye the pictur syde an wyde A propone ti draw out aw the faks about ma faimilie at A hivna sae ferr mentionat an ye'l can desyde fur yeirsells gin A hae it strait or agley; quader or skew-wiff. Ti uz bairns, Mither wes aye a plusquamperfek kinna wumman. Shae niwer stent wi'z. We aye hed a guid screingin wi a pumiss stane or a nail birss gin we hed bruikit hauns an a sair dicht ti the bak a our craigs gin we hedna waashed aricht. We aye semed ti be takkin the gate ti the Kirk an the Sabbath Skuil, or on ivverie-days ti skuil. We wes aye busked and bouned an i guid tyme an rele. Puir John aft hed a tear i'z ei wi the sair kaimin he gat ti ted out hiz lokkerit hair at wuidna shed. This work is protected by copyright. All rights reserved. The SCOTS Project and the University of Glasgow do not necessarily endorse, support or recommend the views expressed in this document. Information about document and author: Text Text audience Adults (18+): Teenagers (13-17): General public: Informed lay people: Specialists: Males: Females: Other: Anyone interested in Scots, and for own family Audience size: 1000+ Text details Method of composition: Handwritten Year of composition: 1983 Word count: 767 General description: first chapter of book 1 (3 books in novel) Text medium Book: Text publication details Published: Publisher: Iain W.D. Forde Publication year: 1995 Place of publication: Edinburgh Part of larger text: Contained in: The Paix Machine Page numbers: 7-11 Part of a longer series of texts: Name of series: Trilogy - "Paix Machine" (1996), "Hale ir Sindries" (2001), "The Kirk, the Skuil, the Buik" (2007) Text setting Education: Leisure/entertainment: Private/personal: Other: Scots Language Text type Novel: Author Author details Author id: 624 Forenames: Iain Initials: W D Surname: Forde Gender: Male Decade of birth: 1930 Educational attainment: College Age left school: 17 Upbringing/religious beliefs: Protestantism Occupation: Retired Architect Place of birth: Edinburgh Region of birth: Midlothian Birthplace CSD dialect area: midLoth Country of birth: Scotland Place of residence: Edinburgh Region of residence: Edinburgh Residence CSD dialect area: midLoth Country of residence: Scotland Father's occupation: Publisher Father's place of birth: Edinburgh Father's region of birth: Midlothian Father's birthplace CSD dialect area: midLoth Father's country of birth: Scotland Mother's occupation: Teacher Mother's place of birth: Edinburgh Mother's region of birth: Midlothian Mother's birthplace CSD dialect area: midLoth Mother's country of birth: Scotland Languages: Language: English Speak: Yes Read: Yes Write: Yes Understand: Yes Circumstances: Everywhere Language: Scots Speak: Yes Read: Yes Write: Yes Understand: Yes Circumstances: Where appropriate